Psa 20 | NOP | STEP | Wapum adi malabumuŋ minta-gamulune kedem gehitubu-lodaluwaak. Jekop’walaŋ Bepaŋdi kedem gabudokoluwaak.

Psalms 20

Me mapme niŋ Bepaŋdi tubulodaune mik gineŋ fafaŋedok ninadiguk

1 Wapum adi malabumuŋ minta-gamulune kedem gehitubu-lodaluwaak. Jekop’walaŋ Bepaŋdi kedem gabudokoluwaak. 2 Adi yoli uŋgoniŋ gineŋ Saiyon uŋoŋ hali kedem gehitubu-kilitiŋa gehitubu-lodawaak. 3 Eŋ siloŋ timiluwaaŋ hogohogok u kedem yabukahileluwaak, tiŋa dumuŋ hemundumunduŋe timiluwaaŋ u adi nadiune utumba hinek tuluwaak.

4 Bepaŋdi du maŋgoŋdok nadilaŋ hogohogok u kedem gambaak. Tiŋa maŋgoŋ kwanai hogohogok titiŋdok nadihebet tuguŋ u kedem gehitubu-lodaune tibaaŋ. 5 Du mik gineŋ fafaŋewaaŋ kaŋ indi wendoktiŋa nadifo tiŋa kap walem toŋa Bepaŋnik wou nintiloneem. Ale Yahwedi yonadige hogohogok kedem nadigambaak.

6 Kobuk agaŋ nadilat. Yahwe negoŋ me mapme napmeguk, tiŋa nehitubu-lodaune mik gineŋ fafaŋelat. Adi yolikweli momooŋ kunum foloŋ uŋoŋ hali yonadine nadilak. Tiŋa undugoŋ adi ne’walaŋ saŋiniŋŋiŋdi nehitubu-lodaune mik gineŋ fafaŋe tilat.

7 Me nolidi wosi heki foloŋ be mik diniŋ kalis ^{▼▼20:7“kalis” Mik diniŋ kali wiliŋiŋ lufom hogok, ala meeniŋ uŋgoŋ loyalune wosidi yehimaneune yawagiŋ.} heki foloŋ saŋiniŋhik uŋoŋ beiŋ. Iŋgoŋ indi adi Yahwe Bepaŋnik’walaŋ saŋiniŋŋiŋ foloŋ hogok wooŋ ulodikilitiyam.

8 Metam hogohogok adi gweheyeeŋ kadakadapmaneeŋ. Iŋgoŋ indi adi toboniŋ fafaŋe tiŋa pilali yatneem.

9 Yahwe, du nihitubu-lodaune indi fafaŋe tineem. Wapum, du Mapmenik. Ale nihitubu-lodadok kutiganiyane nadiŋila nihitubu-lodaluwaaŋ.